本港掛牌的備兌C輪與P輪，總數約有930隻，當中有55隻係×輪，好聽啲叫做非標準輪，唔好聽啲叫做奇形怪狀輪。1年半載前，×輪多好多，𠵱家到期嘅到期，掟落垃圾桶嘅掟落垃圾桶，買少見少。
昨日，有成交嘅×輪得8隻，銀碼好細，若干掛1仙求沽，有賣冇買，以前揸落嘅輸得乾乾淨淨，真可憐。×輪實際數據好難計，好複雜，唔通叫啲炒家成日捧住個電腦計數，就算有網都唔識睇。窩輪炒家，炒易不炒難，點解要炒啲連發行商講解都講解到一嚿雲嘅怪嘢？
奉勸發行商，咪亂發×輪，就算發都冇人幫襯。如果輸家輸得太多，對發行商嘅招牌都唔好。亦奉勸炒家，西瓜共蟹唔識莫買，怪輪亦係。否則上車後幾個月，遇上牛皮市，到頭來發覺「乜蝕得咁傷」。
最近，有4隻黃金窩輪登場，C與P各佔兩隻。昨日，兩隻成交一片空白，兩隻成交金額炒埋只得15萬。隔晚金價有變動，金輪一樣冷冷清清。
黃金C輪：黃金C輪4847收23.5仙，升15%，11月尾夠鐘，溢價4.6%，槓桿率12倍。4966冇成交，按盤價36.5仙，12月尾到期，溢價8.5%，槓桿率18.6倍。黃金係波幅唔大嘅商品，畀4.6%至8.5%溢價，買黃金C輪，蝕水（溢價）蝕到呱呱叫。
黃金P輪：黃金P輪4851收23.5仙，跌15%，11月尾到期，溢價3.6%，槓桿率18.1倍。4970冇成交，按盤價15.2仙，12月尾到期，溢價11.9%，槓桿率74.3倍。
睇啲數據，又係你買埋我份。金價如果郁動小，保證輸錢。
章盛