父親節，囡囡高思與哲思與爹哋吃法國餐，席間雙雙撒嬌，用禮物利誘爹哋開懷大嚼。送乜禮物？波衫一件何止物輕情意重，直頭唔使錢！因為凡惠顧父親節健康餐即免費送贈，老竇又食又拎，今個父親節重唔Happy？
記者：陳冰麗 攝影：伍慶泉
全店禁煙分區清晰
「LIME@T5」位於旺角波鞋街（花園街），開舖半月佔地2,500平方呎，店子以光潔白色為主色，配清新青綠色，甫入店即予人精神奕奕之感。店子分不同區域，入口處有一張獨特發光長枱，左側有2張可坐5人的圓形梳化餐桌，自成一角不受騷擾；不用餐時，可安坐皮椅看雜誌或睇無線寬頻，此店不設吸煙區，注重健康的爸爸不用硬受二手煙。
爭風呷醋愛爸爸
食物原味夠健康
食物方面，所有菜式均用橄欖油和葵花籽油，烹調方法以烤為主，減少肥膩；醬汁則運用大量新鮮蔬菜、香草調製而成，原汁原味夠天然。餐牌好搞鬼，各菜式列明營養成份，並根據其熱量分類，經理Christopher表示：「菜式營養成份同熱量，營養師全部計過晒，務求低脂。」主理菜式的幕後功臣叫Pierre，人認真，簡單如伴碟的一棵葉，也要擺得美輪美奐才滿意。論價錢，不貴，散叫最平小食$30有找，最貴主菜也不過$100，父親節健康餐$185（湯2揀1、頭盤沙律4揀1、主菜4揀1、甜品2揀1及咖啡或茶），當晚惠顧更可獲贈波衫1件，不吃套餐，兩人分別散叫1湯及1頭盤，照送波衫，超抵！
大廚推介
父親節健康餐$185，湯、頭盤沙律、主菜及甜品有多款選擇，以下是大廚Pierre的心水推介：
南瓜湯
湯面浮現橄欖油做成的螺旋紋，增添美感。此湯無加奶或忌廉，用料只有南瓜、水、薯仔，用少許蒜茸及薑吊味，絕對原汁原味。
吞拿魚雜豆沙律（前）
俄羅斯沙律
前者有紅腰豆、雞心豆及南非黃豆，攪碎的紅黃燈籠椒、番茄混橄欖油，再撈勻黑椒粉做醬汁，味帶酸甜好醒胃；後者有西芹、青瓜、蝦肉、番茄、甘笋等新鮮材料，醬汁是乳酪混橄欖油，清而不膩。
烤西冷配意大利粗麥餅伴摩洛哥汁
粗麥餅內含口鮮冬菇及香草，口感超滑；吃西冷謹記蘸多點秘製摩洛哥汁，內有鮮茄肉、蒔蘿等香草，微辣有助提升西冷鮮甜味。
焗大蝦配法國卡馬格紅糙米飯
大蝦集番荽的香及鮮茄的甜，混紅白糙米飯有口感，用橄欖油、蒜茸及番茄煮，飯又多一重香味。
法式Opera咖啡蛋糕
唯一無咁健康的甜品，蛋糕集黑朱古力、牛奶朱古力、Moca慕絲於一身，全部Heavy，但配合一齊確實好好味。
甜薄荷鮮果
Pierre揀選當日最新鮮水果切粒做糖水，滲陣陣薄荷清香，粒粒水果食得出是新鮮即做，啖啖透心涼。
LIME@T5（23885405）
地址：旺角花園街76AT5大廈2樓全層
營業時間：星期一至日11:30am-12:00mn
座位：120個