香港真係美食天堂，除咗中環「鏞記」燒鵝世界知名，位於深水埗福華街亦有間「容記小菜王」，被《亞洲華爾街日報》選為香港兩間最佳食肆之一。
該報過去三年派出兩名食家吃盡亞洲二十四個城市美食，最近喺每個地方選出兩間最佳食肆，兩位老饕嚟到香港呢個天堂，卻棄名店，選咗推介地道風味嘅「容記小菜王」同埋銅鑼灣駱克道嘅「越華會」。
其實「容記小菜王」老闆好有來頭，東主易偉容曾經擔任菲律賓前總統馬可斯嘅御廚，小店最出名就係化皮燒肉，但只做夜市同消夜。呢間店位於最多基層市民嘅深水埗，佢哋都好尊重區內生活困難嘅老人家，沙士時派過抗炎涼茶包，每逢過時過節，佢哋都會向老人家派米，派臘腸、月餅。至於另一間獲選嘅「越華會」，一向都係銅鑼灣區明星食肆，以避風塘炒蟹最出名。
傳真︰2623-9278
電郵︰[email protected]