齋計已退役球員，馬勒當拿都算大紅人，前日喺克羅地亞同蘇加、波班，重有幾個上晒神枱嘅網球佬，包括麥根萊、碧加、伊雲尼斯域踢慈善賽……咦，咁計老馬上個禮拜無喺費拉拿告別賽落場，應該真係唔想搶盡主人家風頭，果真有情有義。
成功減過百磅
查實四十四歲嘅老馬戒毒同減肥後，畀人感覺真係健康咗唔少，五呎六吋高嘅佢，減咗過百磅後，家吓得番一百五十幾磅，基本上瘦身成功；而據報前日場波佢步頭不知幾爽，重整腳窩利，重現球王風範。唔止咁，據報佢跟住重會同麥根萊打場網球，簡直精力充沛，fit到你唔信，有重生之感。
球王洗盡鉛華，近年健康好咗，又得閒去會舊友（費拉拿）、提點下後晉（卡斯辛奴）同埋做善事，對球壇同社會都有貢獻。我求大俠衷心祝福健康一日不如一日嘅佐治貝斯同埋加斯居尼都可以學老馬，咁就大家開心囉。