有報章評估，指曾蔭權有可能搵葉劉出山治港，重新推廿三條上馬。
煲呔斯斯文文象徵英式風格，襯企企理理很大陸街道委員長葉大娘那把權威到極的掃把，當然是中港磨合的一絕。久違了的葉劉，落實了自己那句「後會有期」，重披戰衣，替曾蔭權擋風擋雨擋箭擋背脊，只差在未瞓身擋子彈。有葉劉這門悍將坐鎮，好處唔少，求其諗，是是但但都講得出幾樣：
葉劉護主，紀錄空前，一個頂得住兩個。曾特首毋須兩頭望，左手係葉劉，右手又係葉劉，左手交右手實無失拖，肯定無衝突，不怕失諸交臂，手快與手慢都有。
有了葉劉傍身，那個大茶煲蔡菜子想埋身搵着數，實聽俾葉劉在坪石屋邨髮廊搽好的紅色趾甲外面的高跟涼鞋，插足三十秒，再踢出十二碼界外。一個女強人起飛腳和另一個女強人中飛腳，雙倍地娛樂性豐富，球迷和球證一齊拍爛手掌。
煲呔雖然貪靚，但麻甩佬始終唔能夠太花弗，傳媒很快無鏡頭可捕捉。葉劉助陣，時而貼身tee，時而低胸旗袍，時而黑超原子褲，出入政府總部像行catwalk，夠晒養眼，又能掀起話題。假如學埋欣宜纖體，半年勁減三十磅，頓成中區ＯＬ的偶像。政治娛樂化，葉劉帶頭辣起，全城盡㷫，hit過《殘酷一叮》。我甚至認為，假如葉劉不曾退下火線，一直棟起掃把企硬live到今日，市民每天都有talkingpoint，《大長今》重邊度有人追呀？