香港交易所噚日喺萬豪酒店舉行酒會，慶祝上市五周年，港交所噚日嘅收市價係十九個一毫半，行政總裁周文耀算交到功課。
雖然喺酒會見唔到好多大孖沙，但係唔知係咪經濟好咗，花牌就好多。身為署理行政長官兼財政司司長唐英年當然要畀面出席，另外中聯辦副主任郭莉都有喺台上祝酒。
八方見到行政會議成員查史美倫，問佢煲呔大熱勝出之後，最大挑戰係乜？佢笑話：「咪要團結囉。」查太話，相信煲呔會發揮佢嘅管治能力，大家好快會睇到啲嘢，會去得好快。至於講緊嘅係啲乜嘢，佢就唔肯多講。
另外，證監會主席沈聯濤噚日係最後一次以主席身份嚟酒會，佢同唐唐喺台上鬼咁好傾，唔知係咪有啲唔捨得呢？
傳真︰2623-9278
電郵︰[email protected]
