八方日前講過自由黨田北俊先至最支持煲呔，佢早早就畀晒啲提名票佢，點知日前喺立法會見到佢神采飛揚，先知田少啱啱同太太以及幾個商界老友遊完地中海返港，唔怪得咁醒神。
佢同八方講，六月三號即時畀晒八十八張票煲呔，係因為要趕住喺當晚十點上飛機，飛去意大利羅馬，然後轉機去地中海撒丁島，係嗰度登上遊船，然後去那不勒斯等地玩。
田少話，以前佢次次遊地中海都係坐大遊船，今次就租咗隻細啲嘅私人遊船，只可以住五家人，咁就自由自在得多，可以去到邊，停到邊，食到邊。
佢話架船要半年前預訂，好彩佢唔參加特首補選，否則要留喺香港，就錯過同太太遊船嘅好節目咯。田少今次因要就船期向立法會大會請假一天，佢話絕無僅有，只此一次啫。
傳真︰2623-9278
電郵︰[email protected]