立法會民政事務委員會噚日開會傾改革賽馬博彩稅，點知會議一波幾折，幾乎流會之餘，重充滿火藥味。個會朝早八點半舉行，但係一開波只得五位議員列席，唔夠法定人數，委員會主席張宇人惟有打圓場，話啲委員可能因天雨遲到，於是暫改為非正式會議，聽住團體意見先，結果等咗二十分鐘先籌夠九個人，足半數議員開會。
一到明光社總幹事蔡志森發言，會議即刻充滿火藥味。佢不脫衞道之士嘅本色，首先批評馬會一早向啲議員斟茶灌水尋求支持；跟住又話本身係馬主嘅張宇人一早已表態支持改革，由佢主持會議唔夠中立，激到班議員紮紮跳。有議員即時反擊，譚香文就話早排推咗馬會嘅早餐邀約；卿姐就最㷫，話本來同馬會食早餐只係聽馬會意見，𠵱家俾蔡志森屈佢食咗隻大死貓。
傳真︰2623-9278
電郵︰[email protected]