睇恒指，個市唔得，恒指冇咗80點。但個別股份則好風騷，中國人壽（2628）炒聲震天，11點半過後，買盤重鎚落飛，高收5.35元，升0.25元或4.9%。國壽C輪隻隻生猛，頭16隻威水貨色，清一色係國壽C輪。最大升幅嗰隻係4681，進帳414%。第16大升幅嘅4848，都進帳42%。
國壽C輪4843：國壽C輪接近30隻，有唔少嘅槓桿率重係相當大，講緊三四十倍。正股如果繼續郁，呢啲輪當然繼續飛天，不過正股是否仍升，好難講。美國股神傳入股，邊個知道係真唔係，傳聞若冇咗下文，正股回番，C輪嘅爆炸力變咗殺傷力。食得羊肉唔怕膻，想食大茶飯，就要冒風險。假設正股未來幾日唔升唔跌，則好多昨日急升嘅C輪就有回吐壓力，或者因為溢價收縮而下跌。
國壽C輪4843溢價差不多最小，回報與風險都相對較細。隻輪10月尾夠鐘，輪價47.5仙，溢價3.8%，槓桿率11.3倍（有效7.9倍），引伸波幅22.5%。
中企P輪3834：國企指數升54點，國壽與中石油（857）總共貢獻50點。如果認為兩股升勢唔能夠持續，博國指回頭，可以諗吓中企P輪3834。
章盛