睇電視新聞，內地有兒童社交舞比賽，一對奪得冠軍嘅兄妹，睇嚟未夠十歲，舞姿好有台型，原來係自幼跟隨父母學習，父母係社交舞教師。內地人口多，不同才能之人亦多，好似社交舞咁，本係西方資本主義上流社會之玩意，喺中國居然十分盛行，跳舞人才輩出，靚仔靚女一大堆，香港完全唔係嗰皮。
或因如此，本港之新一代舞男（教社交舞師傅），多數來自大陸，佢哋有三大特徵：（一）精壯之年，（二）舞技一流，（三）英俊靚仔。雖然未必個個係咁，但在上流社會走紅嘅師傅，梗有番咁上下。
去年在飯局上碰到資深賓架Ｒ，佢無端端問一句：「你太太有冇學跳社交舞呀？」左丁山答：「冇噃，忙到一頭煙，冇時間。」賓架Ｒ語重心長咁話：「好吖，驚少一瓣！」問佢點解，佢微笑不語。
最近在飯局上，聽到一啲有錢太太，學跳舞學到入晒迷，最初集體學，後來私家學，最後閂埋房門學，啲老公為之膽戰心驚。一位已離婚女強人更唔好彩遇人不淑，個師傅摸清佢身份之後，諸多要求㖭。
於是醒起賓架Ｒ去年之言，先明白佢嘅意思係乜，太太有錢有空閒時間，日日去學跳社交舞，內藏隱憂，最好就係好似鄺其志咁，跳親舞都係兩公婆一齊出現，一齊跳，一齊玩，包冇失拖。
醫生Ｃ又係鍾意跳舞一族，據佢講：「學到跳探戈，入咗迷之時，男女舞伴身體幾乎全接觸，一啲舞步十分惹火，如果女的似妮歌潔曼，男的似畢比特，隨時一撻就着，確係不可不防。」
學跳舞，估唔到會產生是非，醫生Ｃ緬懷昔日舞蹈名師張亨利教跳舞：一嗱、二嗱、三嗱……純情到極，今日社會實在太複雜。