大市焦點仍然集中喺大型新股方面，其餘二三線股真係好難發圍，或者係咁，所以好多股份都炒得相當無厘頭，求其有啲消息就炒得一餐，查實好多時都係虛火。
奧思（1161）日前剛剛公布截至今年3月底止中期業績，盈利有成1260萬元，比去年同期勁升8倍，派發中期息1仙，同埋特別股息2.5仙，股價噚日即刻發威，最高見過0.52元，收0.50元，升35％，成交股數385萬股，金額184萬元，收市價重係52周新高。
雖然奧思業績好似好靚，但經紀陳就叫小初要睇真，佢話奧思業績靚靚，主要係受惠於新會計準則，經營溢利中包括一筆投資物業升值1560萬元。
奧思本身的護膚品零售及美容院生意，增長並唔係咁大，而且奧思同其他零售股一樣，都要面對租金成本大幅上升的問題。
不過，奧思由於貨疏，要舞高弄低，基本上冇乜難度。
慕容小初