鍾欣桐（阿嬌）和陳柏霖在電影《虫不知》中再度合作，阿嬌飾演年逾七十，但樣貌依然年輕的神秘女子，她和柏霖有幕跳華爾滋的場面，拍攝時阿嬌NG十五次，還整個人失平衡倒在柏霖懷裏。
電影《虫不知》將於下月二十一日暑期檔上映，該片由羅志良執導、梁洛施（Isabella）、陳柏霖、關智斌和Twins主演。Twins成員鍾欣桐飾演長生不老的神秘女子，雖然外貌像少女，但實際上已七十多歲。阿嬌的角色能發掘潛在於每個人身上的超能力，除了引導Isabella跟虫虫溝通外，亦令柏霖增強自信。
NG十五次
阿嬌和柏霖有一幕跳華爾滋的場面，由於二人從來未跳過華爾滋，故電影公司特別安排老師教他們跳舞，阿嬌說：「我哋跟住拍子跳，拗腰、蹺腳、烏低身乜都做齊，初時埋位好唔慣，一係唔記得舞步，一係忍唔住笑，結果NG咗十五次，破咗個人紀錄，之後我成隻腳叉咗去柏霖嘅波鞋面失去平衡，成個人挨咗落佢度，好彩我同佢拍《千機變2》時已經幾熟，但都覺得有啲尷尬，工作人員重睇到嘩嘩聲。」阿嬌還因此扭傷腳踝，要搽跌打酒。
騎呢小發明
柏霖則說：「我哋拍咗成日，跳到腳仔軟，又有好多人圍觀，搞到我哋好似表演咁，都咪話唔驚，事後工作人員叫我做怕羞舞男，真係搞笑。」在另一幕阿嬌整缽仔糕的場面中，導演要求她向柏霖放電，令柏霖忍不住笑。
而柏霖和鄭丹瑞在片中是對非常父子，鄭丹瑞開了一間十蚊店，專賣一些古靈精怪的發明。
