如果問你知唔知Maybe嘅出處，但答唔出，咁你就真係好Out喇！呢句咪《冰之驕子》入面木村嘅口頭禪囉。Maybe你冇時間睇！唔緊要，LG呢個星期推出全港首部可錄DualLayer嘅DVD+R錄影機，一隻碟可以錄成8.5GB，比普通DVD±R/RW錄多1倍咁多！Maybe你連喺屋企睇嘅時間都冇？都唔緊要，呢部機可以將電視劇直接錄落記憶卡度，畀你放入PMP或者PDA上面拎出街睇，有咗咁方便好用嘅DVD錄影機，Out咗都可以即刻變番In！
記者：梁瑋瑜
攝影：林栢鈞
ImageGirl：Samantha
甚麼是DualLayer？
市面上現時一般買到嘅DVD±R/RW，都是使用了「單面單層」DVD-5的技術，容量均為4.7GB；至於DVD+RDL，則是使用了「單面雙層」的技術，意指在同一邊的碟面，可以有兩層的「記錄層」，所以記錄容量亦增大了1倍，激增至8.5GB！可能大家會問，咁我屋企部「普通DVDPlayer」會唔會播唔到㗎？再簡單啲講，DL嘅碟，亦即係我哋慣常接觸到嘅DVD-9，基本市面一般DVD機都可以完全對應，當然唔會有代溝啦！
燒DL碟《冰之驕子》一碟錄晒
市面上嘅DVD錄影機，大多只可以燒到DVD±R/RW、DVD-RAM等幾類碟種，容量則為4.7GB，雖然好多DVD錄影機都有內置硬碟，但係有時候想拎隻碟去第二度睇，或者借畀朋友，始終都係用碟方便啲。LG呢部全新RH-7926，係市面上首部支援燒錄單面雙層DL嘅DVD錄影機，最高儲存容量為8.5GB，比起普通DVD碟可以錄多1倍！如果用最高解像度嘅HQ模式（720×576），亦即現時的DVD質素，大概可以錄到2個鐘；如果你想慳位而唔介意解像度嘅話，亦可以用VCD畫質的EP模式（352×288），錄影時間重可以延長至12個鐘㖭，即係差唔多可以用一隻碟錄晒成輯《冰之驕子》，唔使分開咁多隻碟，借畀朋友都方便好多啦！
至於大家另一關心嘅問題，相信會是碟片價錢；現時市面一般DVD±R/RW碟片，大概做價$3-$10不等，至於DVD+RDL，價錢就要貴上近$40，雖然差價頗大，不過電腦用的內置式DVD+RDL愈見平價，相信碟價會有好大回落空間，出咁多錢買部DVD錄影機，當然要買埋佢個前景啦！
RH-7926?250GB（$5,980）
RH-7521?80GB（$3,980）
直錄記憶卡攞出街睇
下下買碟錄戲，當然唔係咁化算啦！所以RH-7926除對應DVD+RDL燒錄外，機身重內置有一個250GB硬碟，睇啱先錄落碟，當然玩得精明好多啦！此機另一值得讚嘅地方，就係佢有埋直錄DviX影像格式功能；DviX其實是電腦上普遍的影像播放格式，用家可以直接將影像短片，透過機身內置的8合1讀卡器（CF、MD、SD、MMC、MS、MSPro、xD、SM），直過記憶卡之內，如果大家隨身有PMP或PDA一類的流動播放器，咁就可以趁住返工放工嘅搭車時間睇，真係方便非常！而且呢個功能，重可以將大家儲存喺卡裏面嘅相片或者影片，透過DVD錄影機直駁Plasma或LCDTV作輸出，唔使下下拎線駁嚟駁去，你話幾咁方便呢！
HDMI高清輸出畫面勁靚
RH-7926重係全球第一部對應有HDMI輸出嘅HDD連DVD+RDL錄影機，熟悉AV產品嘅朋友都知道，普通色差輸出係行Analog嘅，而HDMI係一個全數碼輸出嘅高清多媒體介面，可以將影像同埋聲音，毫無壓縮咁輸出去其他裝置，咁出到嚟嘅影片，就更加原汁原味，用家可以將部RH-7926接駁屋企嘅HDReady嘅Plasma或者LCDTV，甚至乎係投影機，睇木村同竹內結子嘅靚樣就包保清楚過人啦！
如果想玩平啲，此機重有一個HDD細啲嘅型號——RH-7521，80GB容量好似就細咗啲，不過價錢足足平咗$2,000，所謂睇餸食飯，當然平玩好多啦！
華仁會（23980280）
旺角花園街75-77號花園商業大廈3樓
同場加映：史上最平DVD錄影機
見到$1,280呢個價大家可能會嚇咗一跳，呢部$1,280嘅DVD錄影機唔係國貨，而係韓國牌子HYUNDAI嘅新作TBH（DW）-8020，呢部機雖然冇內置硬碟，不過支援DVD+R/RW呢隻市場上面最普遍採用嘅DVD碟，用起上嚟都好方便。
唔好睇佢價錢咁平就以為佢功能弱，佢原來可以支援到麗音「雙聲道」錄音（市面好多貴價機都未必有呢！），無論你係錄《醫道》定係《冰之驕子》，一樣可以錄完先慢慢揀番聽邊種語言。此外機身重對應G-code功能，啱晒啲懶人對住節目表入幾個數字就可以設定預錄！TBH（DW）-8020嘅外形亦都唔錯，5cm左右嘅厚度放喺細細間嘅房都冇問題，有咗佢，相信以後都唔會再有人用錄影帶喇啩？
冠恒集團 （31851030）
