近期無綫半夜重播羅嘉良主演的百集長劇《創世紀》，此劇五年前首播時收視平平，想不到翻炒竟獲逾五十萬觀眾深宵狂煲，令該時段廣告收益激增百分之二十，同時也令嘉良人氣再升，總算不枉當年他花足近年時間嘔心瀝血的拍攝。
由羅嘉良、古天樂、陳錦鴻、郭可盈和陳慧珊等主演的百集長劇《創世紀》及《創世紀II天地有情》，劇中飾演地產大亨葉榮添一角的羅嘉良當年連續拍足十一個月，雖然捱到金睛火眼，惜五年前播出時收視未如理想，想不到近期半夜重播《創》劇竟吸引大批觀眾勁煲，平均收視高達八點即約五十二萬觀眾，更帶挈無綫在同時段的廣告收益激增百分之二十，而嘉良所唱的劇集主題曲還成為最潮電話鈴聲之一。
環境影響心情
對於當年《創》劇未奪佳績，五年後翻炒卻吐氣揚眉，近期人氣急升的嘉良日前在九龍城接受訪問時說：「當年真係拍到嘔心瀝血，係好有誠意去拍㗎。但嗰時係氣候問題，九七金融風暴後，大家對好多嘢都好擔心，可能係咁，所以唔想睇啲咁heavy嘅劇。𠵱家經濟好番，喺半夜咁靜嘅時間睇會好易投入。」
訪問當日，不少街坊都主動問嘉良《創》劇劇情，可見長篇劇確帶起追看熱潮，嘉良對此說：「好有滿足感㗎，好意外，都冇諗過咁夜會咁多人睇，啲人成日問我最後會同邊個一齊，我諗無綫應該搞番個慶功。」
做事堅持到底
葉榮添在前半段的性格火爆衝動，處於亦正亦邪之間，當年嘉良演繹葉榮添近一年，問他當時會否將葉榮添帶回家中？他即笑說：「唔知道，要問我老婆至知，盡量就唔好帶佢返屋企啦。但始終拍咗十一個月，唔可能唔似佢呢個人，好彩嗰時我太太有BB，會令我有另一種愛心。」
嘉良又揚言也很喜歡葉榮添這個角色，他說：「基本上佢唔係壞人，係非常穩重，冇嘢難倒佢，唯一難倒佢嘅係真情。」
採訪：朱倬誼
攝影：陳偉權
服裝、鞋：DAKS
場地：G.O.D（CausewayBay）
