資深傳媒人程翔俾大陸安仔監視居住咗成個幾月都未有新消息，程太劉敏儀梗係心急如焚，早前畀咗封公開信胡錦濤主席，又親自上電台希望當局要明智處理呢件事，八方問佢，最近有冇程翔消息，佢話冇，仍然係石沉大海，完全冇人接觸佢。
據劉敏儀講，程翔喺國內嘅對口單位係中國社科院嘅陸建華，𠵱家呢位胡主席嘅智囊都被捉埋，所以情況較複雜。原來喺程翔嘅引見下，陸建華舊年喺香港唔只四處見人，同時亦上門拜訪，連教協都去過。劉敏儀話，陸先生的確係見咗好多人，最近寫回憶錄嘅中央政策組成員練乙錚都見過，地點係文華酒店。
其實做香港記者真係好危險，因為大陸遍地地雷，但係一位國內記者同八方講，佢哋重慘，因為香港記者一般坐一陣監就走得，佢哋就一世，唉！你話極權政府幾嚇人。
傳真︰2623-9278
電郵︰[email protected]