舖市資深投資者黎永滔，上月首度入市酒店，三億一向越秀買入北角粵華酒店，諗住搞搞新意思，誰知近日個盤忽然重現市場，叫價三億幾，撻定傳聞不絕於耳。
滔哥同蘭西講，搵律師睇緊契，暫時未取消交易，如果發現啲契有問題，就唔會成交，問業主攞番定金。交易原本十月成交。
睇嚟，單交易隨時有變數，好在買商業樓同住宅唔同，簽咗臨約唔成交，都唔使畀釐印。
講開舖，投資老手大鴻輝，剛以三千六萬，賣咗銅鑼灣怡和街二至六號地下六號鞋舖，三百五十呎，呎價超過十萬，間鞋舖一個月租，大約只係夠買一呎，回報率三厘半。
大鴻輝九八年用一千零五十萬買入呢個舖，揸咗六年幾，勁賺兩倍多，袋近二千六萬，都係多得自由行同行人區規劃帶挈。