新聞處處長蔡瑩璧噚日應仁愛堂董事局主席龐維新邀請，出席午餐會，八方亦去咗湊高興。
啱啱好煲呔早上交提名票，八方見到蔡處長，就即刻問佢有冇新消息，估唔到處長真厲害，㩒一㩒部手機，第一時間話煲呔已經攞到七百一十位選委支持，其中六百七十四個選委畀咗提名，三十六位只係書面支持。
八方於是追問跟住點，蔡小姐話佢哋一直做緊好多準備工作，等新的特首上任，又有排唔得閒，好彩蔡小姐上星期放咗幾日假，去日本玩吓。
好耐之前已經傳蔡瑩璧話會離開新聞處，但今次舊上司煲呔回朝，佢可能又唔捨得走住。
講番仁愛堂，佢哋今年推出「樂助弱老」計劃，目的係喺一年內籌得二百萬元，幫助五千位老人，捐一百蚊就可以令到一位老人享受到一次家居服務，多少冇拘。想捐錢，可上www.yanoitong.org.hk睇吓。
傳真︰2623-9278
電郵︰[email protected]