日本三人男子組合w-inds.早前啱啱推出咗組合嘅第五張大碟《ageha》，一推出就成為日本Oricon大碟榜嘅冠軍，認真厲害，亦證明咗組合嘅十九歲主音橘慶太雖然同松浦亞彌傳緋聞，但仍然無損組合嘅人氣。
今次大碟係以燕尾蝶為主題，拍攝唱片封套時，三位成員不惜畫花靚樣，喺臉上畫上蝴蝶圖案，令人耳目一新。而喺大碟《ageha》同名主打歌嘅MV中，佢哋重特別邀請咗曾參演日劇《GTO》嘅男星山崎裕太演出，慶太則擔任MV嘅旁白。
借片段會港Fans
另外，慶太透露自己最近積極健身，但就俾鍾意韓國男星權相佑嘅媽咪取笑佢想扮權相佑變大隻仔；千葉涼平就話自己近來鍾意食泡菜，更指多食泡菜有助增強抵抗力，而緒方龍一就話得閒會揸車四圍兜風減壓。
雖然w-inds.𠵱家正忙於準備今年夏天喺日本舉行嘅演唱會，暫時唔能夠嚟香港同fans見面，但唱片公司就計劃喺下月一號於數碼港舉行一場戶外MV放映會，播放w-inds.嘅最新MV，同埋佢哋為香港fans拍下嘅片段，又會玩抽獎，重送出日本同台灣舉行嘅演唱會飛㖭。