恒指高低波幅83點，埋單升9點。滙控（005）升1格，扯高恒指18點。思捷（330）唔生性，跌2.50元，跌幅4.8%，拉番低恒指10點。恒指萬四關前反覆，破位仍須努力，大散亦唔容易，可採低位造好、高位造淡策略。
恒指C輪4931：吼恒指跌一百幾十點，喺低位買恒指C輪，對象係4931，11月尾夠鐘，輪價16.4仙，溢價5.3%，槓桿率21.2倍（有效10.8倍），引伸波幅18.6%。另1隻可考慮嘅係4746，壽命短1個月，溢價慳1.5個百分點。
恒指P輪4749：恒指如果升得一百幾十點，則吼低買恒指P輪，對象係4749，10月尾到期，輪價12.4仙，溢價3.4%，槓桿率24.9倍（有效12.4倍），引伸波幅15.8%。
思捷C輪3760：思捷C輪3760散34%，上咗死火榜，有48球易手。歐元跌，思捷冇運行。隻輪8月初夠鐘，輪價24.9仙，溢價5.0%，槓桿率20.1倍（有效10.8倍），引伸波幅33.6%。芬佬掟思捷，估計未掟完，咪咁快撈3760，等思捷回到47元左右，先至考慮。思捷重有唔少長期輪，溢價太高，思捷低位博反彈，長期輪比唔上3760。
章盛