葉璇喺早幾個月前已經處心積慮離開無綫，計劃外闖𢱑銀，所以佢亦主動四圍搵老細敲門問路，希望泊番個好碼頭。
葉璇同人傾親嘢，都會硬銷佢喺舊年擔任奧運主持後，喺內地打響咗知名度，又識得廣東話、國語同英文。雖然葉璇確係叻女一名，奈何佢獅子開大口，拍劇每集開價五萬，當堂嚇窒搵佢拍劇嘅製作人蕭定一。
文頌嫻頂上
蕭定一早排傾掂咗「連生」朴恩惠，拉攏佢同F4嘅周渝民（仔仔）喺下個月開拍時裝新劇《Silence》，本來蕭定一都有斟葉璇演出，安排佢喺劇中同仔仔大演感情戲，點知葉璇開價成五萬港紙一集，重貴過黎姿同宣萱呢啲正印花旦，由於價錢太貴，所以蕭定一都費事嘥子彈，決定飛起葉璇，改搵佢新簽經理人合約嘅文頌嫻頂上。
蕭定一日前亦承認係有同葉璇傾過拍劇，可惜大家傾唔啱價錢，所以今次合作唔到，但蕭定一都有讚葉璇係個好演員，希望第日可以再有機會合作。
其實以葉璇今時今日嘅實力，接內地劇最高都可以叫價三萬一集，如果佢繼續抬高身價，恐怕機會只會白白流走。
