中國青年隊日前以少踢一人下，爆冷擊敗烏克蘭國青，再令球迷刮目相看；由於另一肯定出線隊伍西班牙同日較遲開波，所以中國係第一支打入最後十六強隊伍，認真威威。
國青分組賽兩戰全勝，剩餘對手係兩戰全敗嘅巴拿馬，只要和波都可以首名出線；而呢個首名出線資格好重要，因為次名出線嘅話，對手會係F組次名。呢個小組有巴西、瑞士、尼日利亞同埋亞青賽決賽贏過國青嘅南韓，雖則失去首名出線資格機會好微，但下仗對巴拿馬一樣唔可以鬆懈，否則要達到賽前八強目標阻力會大好多。
國青開賽前未俾人睇好今屆賽事有成就，連外國博彩公司將佢哋列做奪標大冷門，賠率超過二百倍，𠵱家肯定出線，奪標賠率冧到得四十一倍。其實，國青部份球員開賽前知道被列入大冷門而氣憤，認為實力同土耳其相差並非太遠，今次可謂大踢爭氣波！