長實採取密集式宣傳攻勢，推銷旗艦豪宅大坑名門，喺德國及本港，每日向傳媒派新料。呢個盤選用其中一個品牌LEICHT，係德國數一數二嘅大公司，長實帶同成班記者遠赴彼邦，連國會議員都出嚟同大家見面，落力介紹呢隻牌子。
議員DrStefanScheffold話，間公司產品外銷好強勁，而自己喺海外機場或足球賽事，見到佢哋嘅廣告，都特別開心。
負責名門銷售嘅長實高級營業經理黃思聰，正喺德意志親自介紹名門用料，日前同國會議員到會議廳影相，佢就坐咗主席隔籬個位。到參觀LEICHT廠房嘅時候，就一身技工制服打扮，喺每個製作工序前面扮熟手技工。
至於喺香港，長實高級經理梁婉君同傳媒講，名門唔單止用料來頭猛，連售樓書都寧舍重本。個盤製作三百本精裝版樓書，一書三冊，封面用上奧地利紫色閃石，從未試過用喺印刷上。個樓書盒就用銀色，取其「銀紫」同銀紙諧音。
個盤宣傳攻勢咁勁，聽聞，何鴻燊三太率先預留八伙，呎價萬四至萬五，以最細嘅單位計，涉資約兩億。不過，暫時未聽見長實攞到名門售樓紙，有興趣買家，要等到下個禮拜，至可以睇到示範單位。
電郵地址：[email protected]