當奴一坐正，果然犀飛利，佢一話唔鍾意港台播賽馬，上天送禮，當堂不但冇得播，重落大雨連場馬都取消埋！
當奴升城隍，即時狂風暴雨，連馬都為之停跑，咁你話嘞，未來兩年，香港行乜運？
風從虎、雲從龍，黃色暴雨警告，當奴一夠七百幾票，就即刻天降豪雨，同佢黃袍加身，你話中國式政治，係咪好邪？
未來兩年會否風調雨順
當奴攬票，一票不剩，兩名挑戰者又唔識玩策略，棄詹保達，齊齊過票，於是就搞到爵士過七百票爆燈當選嘞！
有人話：當奴使乜去到咁盡呢？贏二百票係咪夠呢咁？要咁多係咪太霸道呢又？
呢個問題應該點答呢？會唔會查實爵士都唔想咁多提名，想控制在六百票以下，點不知老左陷害，係咁「質」票，佢嗌飽嘞飽嘞，啲反曾勢力話，飽呀？未飽！係咪要票咩？要吖嗱，要吖嗱，咁就質到當奴成口都係票嘞！
跟住又話煲呔霸道喎！反曾勢力在何處？就在八百人選委會之內，反曾玩政治，今次玩得高招，包括較早時動議全港中小學扯五星旗、七一賀回歸大巡遊，以至到狂質提名票呀咁，都似係明捧場，暗踩場。黃色暴雨賀當奴，未來兩年，未知係唔係風調雨順，放長雙眼睇喇！
傳真︰2623-9278
電郵︰[email protected]