受到燃油成本上漲及價格競爭影響，大陸航空股近排一直冇運行，但好奇怪，中航興業（1110）股價就一直高企，成交亦趨多，好似噚日咁，隻股再升4％，收1.94元，再睇真些少，原來已經係52周新高。
經紀黃話，江湖傳聞中航興業旗下港龍航空與國泰航空（293）之間的合作，將有進一步發展，但究竟係兩間公司重組合併，抑或係國泰進一步持有中航興業阿媽中國航空（753），佢話重未收齊料，但有關消息已給市場無限想像空間。
就算唔講港龍呢一筆，中航興業喺澳門搞廉價航空已受到證券界睇好，種種因素加埋，令到隻股近排走勢強勁。
單睇股價走勢，似乎春江鴨最鍾情中航興業，若有重組計劃嘅話，估計最着數應該會係佢。
至於國航，上市剛好夠半年，現價仍潛緊水，昨日冇起跌，收2.725元，較招股價2.95元跌８%，成交股數422萬股，金額1145萬元。
慕容小初