近日大家發夢都噏住3328，即係今日截止認購的新股交通銀行（簡稱交行）。交行是六隻來港上市的內地新股中最熱的一隻，亦是自去年11月領匯上市後，今年首現攞表人龍的新股，皆因個個諗住靠佢發達！打工生涯原是夢，究竟3328係咪等如生生易發，不妨聽吓三大股神意見！
記者：邵超
攝影：陳盛臣
Models：Leo、Carrie（Salvador）
炒硬大笨象概念
六隻趕住抽股民水的新股，除交行外，還有昨日已掛牌的神華、中國玻璃、中遠、民生銀行和中國建築，每隻新股的背景都是在國內頗具實力。雖然神華反應冷淡，但交行作為在港上市的第一隻內地銀行股，由於滙豐（俗稱大笨象）持有19.9％股權，個個炒硬滙豐概念，魅力零舍不同。連城中巨賈鄭裕彤、李兆基都大手入飛，造成明星效應，近期市場個個股民眼中只有交行！
陸叔：師奶愛煞銀行股
著名股評人陳永陸：「交行點解咁熱，最主要原因是滙豐在交行擁有約20%股份，而香港的師奶一向鍾情銀行股，加上傳媒催谷，個個都諗住買滙豐概念。滙豐在管理方面向來畀到人信心，好似佢當年收購恒生都做得好好。國內銀行需要InternationalApproach，滙豐又想打入國內市場，預計未來滙豐會食咗交行，好似平安保險咁，做咗滙豐的附屬公司。」
曾淵滄：炒概念贏晒！
城市大學管理科學系副教授曾淵滄：「交行咁熱係因為滙豐概念，滙豐是交行第二大股東，預計交行是國企銀行管理最好的一間，利潤會提高。短炒賺幾多好難估，就算長揸都OK！跟住的民生銀行無得同交行比，它無滙豐概念，炒股票概念重要過任何嘢！」
曾淵滄醒你：短炒長揸四攻略
交行發行H股股數逾58億股，集資約150億元，入場費只需$2,576（一手1,000股），大型新股中算它最平民化消費。咁大隻蛤乸隨街跳，散戶點樣捉蛤乸呢？即睇曾淵滄提供的四大攻略。
攻略一：填表去抽
學曾淵滄話齋，交行肉就肯定有得食，但唔會多，如果超額認購逾一百倍，抽中機會僅百分之一，可能十手只係配到一手，只買一手隨時被Out！買兩至三手最穩陣，即使配到一手都可以賺幾百蚊。
攻略二：炒孖展
銀行和證券行提供低息孖展優惠，用十萬當一百萬使，一個人頭申請通常會配多啲。但炒孖展點都有風險，如果一百萬只分到一千股，計埋利息分分鐘蝕本。
攻略三：等掛牌
如果諗住長揸，不妨留番嚿錢等掛牌上市先落場，觀察頭一兩天走勢候低吸納。
攻略四：雙管齊下
曾淵滄對交行好有信心，短炒同長揸都無問題，佢自己就斥資一百萬買交行，預咗有得分，配到幾多股份都會Keep。之後再等埋上市時睇準低價位掃貨，預咗長揸。
賺過做定期
若以10萬元成本入市，究竟投資交行博唔博得過？凱基證券董事鄺民彬認為，投資交行可長可短，短炒目標價$3可沽，長揸到$3.3沽。
鄺民彬又認為，交行長揸應該有可為，但變數亦多：譬如交行股本回報低、壞帳問題、國內投資工具少等。像國壽、平安保險咪又係歸於平淡，始終敵不過市場！至於陸叔亦認為交行唔係完全無問題，好多問題現時收埋咗未浮上面，但相信母公司應該頂得住，投資者應採審慎態度，量力而為。
勁賺22倍
預計一年戰績
第一天掛牌即追10萬元貨，一年目標價$3.3，回報率為：
（$3.3-$2.5）/$2.5×100%=32%賺$32,000
一年定期存款利息：
$100,000×0.145（滙豐牌價）=賺$1,450
（渣打7月15日前做緊0.26，即賺$2,600）
六股連環追擊好唔好？
陸叔：「新股唔係一個潮，記住新股只是一隻股票，唔好分散晒資金，建議買兩隻銀行股（交行和民生）、神華和中遠，其他就唔好諗咁多。買股票始終有風險，借錢要還息，最好只係玩現金，每買完一隻股，有退款返先至買第二隻股，量力而為。」
曾淵滄：「一隻股好，就唔好望其他。手上有幾多錢就去申請，我贊成重鎚買晒單一隻股！買股票要集中力量先至賺到錢，抽唔到的等退款返嚟留番掛牌時落場長揸。」
