基金經理Ｋ約食飯，搵埋外滙Ｐ，本來話去銀行家會所食中菜嘅，左丁山摸到上去，原來基金Ｋ已經坐在酒吧內，轉食自助餐。基金Ｋ話：「真對唔住，我一時疏忽，唔記得早啲訂位，今朝打電話嚟訂，中菜、西餐廳已經滿晒，惟有早啲嚟酒吧搵位。」跟住外滙Ｐ駕到，講起銀行家會所今年確係好難訂到位，訂中菜要早一個禮拜預訂。前兩年，呢個會所好靜啫，中菜廳經常得五成客，何解到咗○五年，生意咁興旺呀？大家諗唔到答案，總之係旺啦，代表銀行金融界生意興隆，人人開心，嚟銀行家會所畀人見吓，亦都見吓人。
老實講，銀行家會所三十年如一日，無論中西菜都冇乜驚喜，屬不過不失之類。論價錢，唔算好貴，上到置地廣場告羅士打大廈頂樓食餐，點都有兩錢面子。
講起中午訂位，外滙Ｐ話：「早一個星期訂位，唔算誇張，你試吓訂IFC二期嘅利苑，要十四日前訂位呀！」吓，咁巴閉，利苑雖然有名氣，但唔算係一流頂吖，價錢就真正一流嘞。基金Ｋ笑住講：「真㗎，我啲下屬話曾經在網上有人轉讓利苑午飯時間嘅訂位，係咁意收番啲轉讓費喎！」講都唔信，左丁山立即叫秘書打電話去試訂，果然要十四日之後先至有位；再試訂晚飯，明天就有位。原因就好簡單啦，中午IFC人頭湧湧，人人要食飯，啲賓架、卜架好景，銀紙鬆手，所以利苑逼到爆。到咗夜晚放工後，IFC水盡鵝飛，利苑咪有位囉。
聽餐廳Ｒ講，飲食界傳聞倫敦最巴閉最昂貴嘅中菜「客家山」（陶傑曾經品題）正與置地洽談，可能在愛丁堡大廈開業，配合LandmarkMandarin及HarveyNichols兩大名牌開業。假如這是真的，置地廣場到咗二○○六年初就會成為全港最高檔嘅消費地方咯。