中環路上，行色匆匆，幾乎撞到一位身穿深色西裝之男士，好彩大家及時停步，相互一望，唉吔，原來係資深醫生Ｌ。所謂資深，多數係港大醫學院產品，中大醫學院啲第一屆畢業生，都只係四十零歲啫。
既然咁啱撞到正，不妨幽默一啲，問Ｌ醫生：「行得咁快，返港大參加示威呀？」醫生大笑：「邊度有咁得閒，唔使做咩。」左丁山問：「嚴肅啲講，你會唔會支持郭家麒穿着白袍在港大醫學院示威？」Ｌ醫生一面嚴肅咁講：「唔會，我唔係中大之友！」吓，乜嘢意思呀？Ｌ醫生大笑：「十億元捐畀港大好過捐畀中大啦，我哋係老大哥噃，嗰啲反對捐款冠名，搞搞震之人，我懷疑佢哋係中大之友，要鬧怕啲捐款人，等佢哋唔敢捐錢畀港大，搬錢過海畀中大！」
Ｌ醫生果然幽默，咁嘅理由都俾佢諗得到。有時做事過於道貌岸然，只會增加工作與心理壓力，不妨開吓玩笑，放鬆自己，如果唔係，尊子漫畫邊會咁受歡迎吖。好似曾候選人話唔鍾意港台播馬咁，有聽眾反應熱烈，打電話去《自由風自由Phone》各抒己見，有贊成，有反對，人人有唔同理由。但一位女士打電話去贊成停止播馬，理由就係：「好多人唔知道孫中山係基督徒，港台要講吓，乜乜乜係基督徒，港台要講吓……停咗賽馬，港台可以做到更多節目，例如基督……」
聽到熄機。唔通港台要變成基督台咩，日日講基督教道理？講吓道教、佛教、伊斯蘭教得唔得？如果港台唔講馬，左丁山就情願港台每個鐘頭講一個笑話，等全港聽眾輕鬆啲，啲立法會議員開會想瞓覺之時，聽吓港台笑話就精神番，做番啲正經事！
（按：六月十三日本欄講《流放朱培慶》，內裏提及「體會領袖苦心」，印出來變成「體會領袖芳心」，合更正。）