細路，咁細個嚟馬場玩？你夠秤未呀？香港馬場一直是細路禁地，18歲跟朋友初入馬場，意義上等同大個仔過「成人禮」。但去到日本，讓小朋友知道你沒試過跟父母在綠茵賽道歡呼吶喊，小心被看扁了。皆因日本馬場內外似十足個繽紛嘉年華，大人全神貫注計算賽馬賠率之時，小朋友就在那邊坐新幹線跳彈床，靚姐姐拖住微型馬跟小朋友玩親親，分分鐘唔肯走的是小朋友呀！
記者：陳慧敏 攝影：林栢鈞
一家同樂睇馬仔
位於日本府中的東京競馬場，由東京市中心乘高速火車不過30分鐘就到。不過更威的是，馬圈內至觀眾席，小朋友都可以自由出入。基本上，整個馬場都是小朋友樂園。觀眾席後面有賽馬博物館，馬場中央草地又有靚姐姐跟小朋友踢足球攞禮物，有鐵道員跟大家坐新幹線，還有跳彈床、馬車遊園，迷你馬定時定候出來跟你拍照留念。畀得200円馬場入場費，小記即時睇睇每個遊戲到底又要掠水多少円，免得贏了禮物仍蝕底。原來只要你肯排隊，場內活動統統免費，即是15港元玩足一天，抵嗎？
賽馬博物館免費玩
馬場入口處有個賽馬博物館，除了有特別展示室展示世界賽馬史、馬匹骨骼構造以至練馬情況外，館內還有似足賽馬機的賽馬實況模擬器，唔使出力猛Un，就可以體驗機械馬由入閘慢慢行，到最後直路極速狂飆的快感。小記不顧攝影師恥笑超齡試騎（查實都冇年齡限制，只是咁啱排隊的都是5、6歲小學生而已），初段還好，尾後直路衝刺，嘩！蹬到阿媽都唔認得，不容小覷。
賽馬博物館
開館時間：星期三至五：10:00am-4:00pm
星期六、日及賽馬日：10:00am-5:00pm
私人電視 昅實兩地賽事
03年重整後的競馬場，莫講話有自動販賣機可以投注（櫃位勁多，直接入円唔使下下好似香港咁排幾分鐘隊買代用券，攞到貼士都買唔切），連賽馬情報都可以好似自動販賣。不過由於只得日文版本，不懂日文的港人還是別買，免得未跑先蝕。而特等觀眾席，每卡都有電視一部，可同時收看京都馬場的賽事，實行昅實兩邊情況，所以馬匹入閘準備之時，觀眾席都不時聽到有人忽然狂呼。馬場入場費200円，只可在馬圈外坐地下睇。3、4樓觀眾席就收300円，而有電視的特等席就要2,300円。
後記
細路仔在馬場內周圍走，對香港來的小記而言，畫面實在有點不協調，難道要讓孩子看到大人們賭馬賭到兩眼放光的樣子？還好綜觀場內有份鋪草皮跟贏錢笑到四萬咁口的日本人，馬匹衝刺時興奮「Hi吔咕，Hi吔咕（快啲快啲）」的叫，輸了也不過笑作一團就算，未見有人發爛爆粗，天倫樂跟香港兩眼冒光的賭馬文化差天共地。
JRA東京競馬場
地址：東京都府中市日吉町1-1
網址：www.jra.go.jp
交通：於新宿乘京王線至府中競馬正門前駅，徒步1分鐘。
出門提一提：
簽證：不論持BNO或特區護照均毋須簽證。查詢：25221184（日本領事館）
套餐：東京4天逍遙遊（JTKAA4G），乘港龍航空，包3晚住宿連早餐、住宿多摩京王酒店、SunshineCityPrince或ShinjukuWashington，價錢$2,999起。查詢：27222888（新華旅遊）
網頁：www.sunflower.com.hk
貨幣：100日圓約兌7.3港元
求助電話：03-3403-3064（中國駐日本大使館領事部）
鳴謝：新華旅遊、SanrioPuroland、多摩京王酒店、憇之湯多摩境店、雛燒雞山、PENDAHOUSE
