恒指跌47點，表面上跌幅唔大，但窩輪市場則燶味唔低，跌幅逾20%嘅，超過50隻。隔晚紐約油價升近4%，中石油（857）則幾乎下跌4%，睇啱油價走向都要輸。石油C輪就係有份大跌嗰批。
油價波動，炒石油窩輪有着數？千祈咪諗，賭多隻輸多隻。
期油C輪4861：油價升，期油C輪4861掂檔，收61仙，升17%，冇乜人發達，街貨0.2%即係唔夠40萬份，而是日成交亦只係得13萬份。睇數據，有5個月壽命，溢價10%，槓桿率7.3倍（有效得4.6倍）。就算睇好油價，咁嘅數據，冇法子買得落手。油價擺嚟擺去，都係幾美金上落，期油C輪溢價漸縮，揸貨者好難唔輸錢。發行商成日教人睇引伸波幅，4861引伸波幅高達47%，咁高嘅引伸波幅，點買？
期油P輪4865：期油P輪4865跌13%。隻輪同4861同日到期，輪價33.5仙，溢價16.5%，槓桿率13.3倍（有效得4.1倍）。引伸波幅又喺47%，你買埋我份。4861與4865兩隻一齊買，幾乎肯定輸硬。4861由面世以來，現價較發行價升20%，4865則跌31%。油價若然繼續喺幾美金範圍內上落，兩隻輪都會一齊跌。
章盛