新股招股，吸走市場大部份資金，股市繼續淡靜，行情就在窄幅內上落，恒指收市13904，跌47點，成交145億元；期指收13934，高水30點。睇個勢，始終係要大藍籌輪到期以及申請新股資金回籠後，大市先有作為。
國企又轉弱，國指收4647，大跌68點。不過，有隻大強勢股就繼續有好表現，佢就係哈爾濱動力（1133），衝破3元大關，高收3.05元，升0.125元，升幅4.2%。
哈動今個月初重係企喺2.40元水平，升上2.65元後，停一停，再連續大升3日，搶上3.075元，成交連日大增，噚日更去到2887萬股。一隻股票升得急，自然有消息，唔排除會係業績轉好，為股價帶來刺激。
睇番4月8日本欄，推介哈動，當時除話其04年度（12月年結）嘅盈利會激增外，重講過：「以前市場傳過兩個消息，一個係外資入股哈動，另一個係母公司注資，家吓行業未來幾年處於高峯期，入股和注資都係有可能發生的事，股價亦會因此而大幅上升。」推介之日，哈動股價2.225元。
股價升成交增惹憧憬
業績利好、外資入股、同母公司注資等，都有可能係股價上升的理由。哈動近日急升且成交大增，買盤又多係大行同基金，不會無因，相信好事亦快近。
不過，哈動近日升得太急，高位不宜追入，等佢調整時，例如股價落番2.80至3元才上車，博見3.30至3.50元。
哈動係中國最大的發電設備製造商，也是唯一可同時生產火電主機、水電主機及承包電站工程一體化的企業，04年上半年營業額38.15億元（人民幣．下同），獲利3417萬元；全年營業額102.16億元，獲利1.18億元，每股盈利9.9仙。
集團去年毛利率下降，但今年會有改善。首先今年簽訂合同定單價格較高，同時會把原材料漲價影響轉嫁予客戶。估計05年盈利會以倍計增長，預測PE可望降至低雙位數。
早前推介的第一拖拉機（038），調整完成後，升勢再起，收1.51元，升8仙，可上移止賺位繼續持有。
郭兆誠