唔好以為贈品只係買日本雜誌的Bonus，其實齋買件贈品唔要本雜誌的大有人在！家陣的潮人個個為咗贈品而唔睇雜誌，全因贈品往往都係日本潮牌交叉Products。尤其附送潮牌BathingApe贈品的日本雜誌，更加係一出即被掃斷。喂！重唔快啲去搶！
記者：黃藹瑩
攝影：陳偉強
ImageGirl：Kylie
拆贈品獨立發售
日本雜誌的贈品之所以吸引，係因為佢哋唔係普通贈品咁簡單，普普通通的手巾仔、貼紙、CardHolder或者係飾物，只要經過潮流牌子包裝，立即變成搶手貨。旺角潮流特區的日本雜誌舖買物王，有見一眾客仔都只愛贈品不愛書，索性將某啲雜誌贈品擺出來賣。不過店主就強調：「我哋通常只會將過咗期的日本雜誌贈品拆出來賣，絕對唔會特登抽起新雜誌的贈品炒賣！」
店員丘小姐話，好多時都會有客人專登嚟問個別啲牌子同贈品，而最多人搶購的就一定係Ape！邊本雜誌附送Ape的Product，嗰本雜誌通常好快就會賣晒！
熱搶贈品排行榜
其他雜誌贈品選擇
今期必搶贈品
搶手貨：
一眾日本雜誌贈品中以Ape的贈品最受潮人歡迎，尤其是貼紙同手巾仔，一出就會好快俾人搶購一空，要買就趁手！
非常唔掂：
呢個膠波就係Bapy無乜人想儲的失敗之作！
潮舖主理人：Ape貼紙儲得過！
潮舖Anytime主理人Dary以賣BathingApe起家，自己本身都係ApeFan的佢，指出並非所有Ape贈品都咁搶手：「嗰期雜誌的贈品搶唔搶手其實要視乎佢哋的實用性同值唔值錢，好似Stickers咁，本身個牌子（Ape）自己都有出，賣成百蚊一張，而且Stickers個Print重可能從來未喺T-shirt或者佢其他的Products出現過，咁就珍貴喇！一本雜誌咪頂多50、60蚊，重平過淨買一張Sticker，咁就會好搶手，平日唔睇開嗰本雜誌嘅人都會為咗呢樣嘢買書。不過都有例外的，就係唔實用嘅嘢，好似之前嘅吹氣膠波就冇咩人會搵！」Dary認為Ape贈品除咗貼紙比較炒得起之外，其他的真係要視乎個人喜好或者收藏，所以唔會喺自己的舖頭散賣呢啲贈品。
日本雜誌差價一倍
一個月有咁多日本潮流雜誌出版，睇得唔齊、唔夠多又怕會Out，但係要買得齊咁多本，睇怕個荷包都乾塘！今次記者幫你行勻港九各雜誌舖格埋價，發現原來以本港最賣得的《non-no》為例，銅鑼灣同太子可以相差接近一倍之多！
巡區大格價
1.《non-no》（6.20號）440日圓
售賣點：
Sogo旭屋 $62.9
灣仔188二樓 $36
太子聯合地下 $34（最平!）
旺角潮特地庫 $36
2.《Cutie》（7月號）490日圓
售賣點：
Sogo旭屋 $70.1
灣仔188二樓 $59
太子聯合地下 $61
旺角潮特地庫 $57（最抵買!）
3.《Boon》（7月號）450日圓
售賣點：
Sogo旭屋 $47.2
灣仔188二樓 $37
太子聯合地下 $32（最平!）
旺角潮特地庫 $37
4.《Mensnon-no》（６月號）630日圓
售賣點：
Sogo旭屋 $69.3
灣仔188二樓 $51
太子聯合地下 $42（超平!）
旺角潮特地庫 $51
買雜誌，為筍貨？
兌換率造成差價
同一本雜誌價錢有貴有平，究竟點解？買物王店員丘小姐指是大家對日圓的算法有分別：例如空郵到港的雜誌多數以13（即1港元約兌13日圓）至14計算，平郵到港的雜誌就會以10至11計算。而且呢個算法間間鋪頭都唔一樣，所以就會有貴有平！如果知道某啲贈品係會多人搶的話，行家們都會提高該雜誌的售價發售。
查詢：買物王（21360103）