四十六歲的美國過氣流行天王米高積遜（MichaelJackson）涉及的狎童案經過四個月的審訊，終在香港時間昨日凌晨作出判決，被控猥褻兒童、串謀拐帶及非法禁錮等十項罪名的米高，全部罪名不成立，獲當庭釋放。這宗全球矚目的世紀官司之裁決引起全城熱話，亦成為圈中人昨日議論紛紛的話題。台灣名模林志玲和蔡少芬等均表態撐米高，但方中信卻對判決提出疑問，利嘉兒更相信曾有狎童案發生。
方中信：件事有迹可尋
法律係咪公正，我唔夠膽講，佢如果無辜就唔使咁多輔助，如果係清白就唔使咁緊張。我對米高單案嘅判決結果有啲疑問，我小時候幾鍾意佢，但係若然單嘢係真，點可以接受？其實件事有迹可尋，佢庭外和解都賠億幾畀人啦！我以為佢有（罪），點知乜事都冇。
吳彥祖：唔鍾意佢漂白
我細個都鍾意佢，不過，佢漂白皮膚之後就唔鍾意。單案點判為之輕，冇證據話佢做過，冇得話輕唔輕，不過，如果判佢坐五十年就重得滯。
楊千嬅：鍾意貓王多啲
我唔知詳情，中間因為細路仔嘅媽咪曾經有詐財嘅案底，我唔知點去批評，我細個鍾意貓王多啲。
林志玲：整容有特色
我很喜歡聽他的歌，他是很多人年輕時的回憶，我不相信他會這樣做（狎童），我沒有親眼看到，不會這樣為他定罪，希望大家給他機會。至於米高多次整容弄至今天的模樣，我覺得很有特色呀。
曾志偉：人還人歌還歌
我聽聞佢話今次獲判無罪後，佢會喺年尾為南亞做一場義演籌款。幾好吖，好心有好報。佢實在係太多人嘅偶像，佢都係我偶像，不過，人還人，歌還歌，佢唱嘅歌、跳嘅舞係一流，經過今次之後，知道佢以後嘅生活都唔係太好，之後會幾有影響，我諗佢會重新做人啩。
利嘉兒：唔會冇發生
我覺得唔會冇發生囉，唔係點會嘥咁多人力物力審呢單案？米高係咪完全唔啱、又或者係有人會利用佢嘅身份搞大件事，其實兩方面都有問題，但邊個唔啱多啲就真係冇人知，法律係要講證據。
蔡少芬：做過就要罰
陪審團同法官咁耐都搵唔到足夠證據，相信法律都係公正。喺我立場我只係欣賞米高嘅歌藝才華，有冇做過係佢私人事，我唔知道，但如果有人真係做過呢啲事，任何人都應該要受到懲罰。
採訪：張俊銘、何永寧、卓寶花、林妙萍
攝影：陳志嵐、陳偉權
