煲呔登基做新的特首，經已鐵成定局！爵士狂風掃票，揸過掃把，確係唔同，好似清道夫掃街刮落葉咁，眨吓眼就狂奪七百票，幾籮咁多，真係趕盡殺絕！
啲老左唔知係賀佢登基，定係暗醒塊西瓜皮佢踩，工聯會竟然宣布，舉行「和諧團結創明天」大巡遊，又扯五星旗，又舞獅又打功夫，實行7.1大搶場行動！
點解話老左有想跣爵士之嫌呢？因為明明今年7.1又冇23條，又冇咗廢董，香港人經已冇乜動力去遊行，但現時工聯會擺明向全港市民（左仔除外）擺陣挑釁，侮辱7.1精神，咁就會激起有正義感嘅市民強烈反彈，本來唔去7.1遊行嘅，為咗騷陣容，再次展示人民力量，有理冇理，都要遊番一遊！
挑釁市民上街倒曾
咁就會無風三尺浪嘞！谷多啲市民7.1上街，冇五十萬，都係咁易整番十萬，有乜口號好嗌呢？就係「打倒小圈子選舉」、「反對強政霸道」呀咁，整吓整吓，就變咗矛頭直指曾蔭權，嗌佢落台嘞！
呢一招借刀殺人，夠毒呀！工聯會若然真係想幫曾爵士賀佢坐正，就唔會無喇喇搞甚麼7.1愛國大遊行，而係喺新光戲院，閉門做一場「全港愛國同胞與曾爵士心連心文藝大滙演」，在舞台中央掛起煲呔肖像，工聯會一齊大合唱，由嫻姐表演紅綢舞，再由蔡菜子表演女聲獨唱，唱番隻歌，歌詞話：「抬頭望見北斗星，心中想念曾蔭權，前進的道路有方向，有了曾特首，愛國同胞喜洋洋，呀喜洋洋」呀咁，至叫做真心愛國擁曾愛港吖嘛！
現在，不但冇「新光星輝耀蔭權」，反為主動去刺激香港人上街遊行嘅意願，唔知係咪想代中央壽爺考吓煲呔，7.1若果又整出五十萬人遊行，睇吓煲呔會唔會用武力鎮壓呢？
爆料熱線：29290000、27860099
報料傳真：26239278
報料電郵：[email protected]