理想家居：Gucci孖G牆紙玩燈效日Cool夜Warm

有啲人鍾意玩原則、乜都要貫徹始終，所以屋企都要布置到同一個Tone，由大門到廁所都係同一風格，認為咁先夠型格夠突出。亦有人怕沉悶，鍾意將全屋唔同區域設計到各有性格，當人人都以為屋主必定將牆油到七彩玩唔同顏色嘅時候，Danny就用4款唔同Pattern及質感嘅牆紙玩主題，雖然三房兩廳只得兩人住，但就創造出4款風格，至令人又羨又妒嘅固然係Gucci孖G牆紙，但原來只需幾百塊錢，你都可以！

記者：梁彩燕　攝影：何家亮
設計公司：i-designFurnitureCo.（27688933）

Danny對單位只有一個簡單的要求：「主要係簡約啲、簡單啲，其餘都留番畀Designer發揮。」設計師Tracy就話：「因為單位擁有3房2廳，房間及客飯廳都可有較大的發揮空間，可做到每Part都有不同主題，而主要技巧則運用牆紙和燈光效果來營造唔同的主題和感覺。」

■大型鏡牆有助擴闊空間感。

客飯廳：白色基調

此區主要以白色做基調，牆身髹上全素白，飯廳裝有一幅超大鏡牆，空間感已經倍增，大櫃則一律欠奉，經常講的層架、儲物櫃要「向高空發展」更是無影無蹤。客廳則可算是影音區，印象只有黑與白，Cool到痹，全歸因於一幅面積約6呎、貼上Gucci孖GMonogram牆紙的FeatureWall。呢款由Gucci生產的牆紙推出咗白色、卡其色同深啡色，但白色會令客廳不起眼；卡其色又較普通；𠵱家用咗超深啡色，而且Pattern的體積都較大，視覺上就唔會密麻麻或眼花。設計師Tracy話：「女主人阿Ling想感覺Warm一點，所以燈效方面就用一種偏黃的白燈，夜晚開燈感覺便會暖一點，同時又可以維持全區的白牆、白櫃和牆紙的效果。」

■近年勁流行的雜誌架連鞋櫃，為了遷就位置而設有橫趟及推拉門。

■購自G.O.D.的全白色小櫈連儲物箱，夠實用。

■不想飯廳的鏡牆太大幅不好看，裝飾框作粉飾。

主人房：和式柔和風格

很多人都嚮往舒適的生活空間，對於用來休息充電的睡房更不容忽視。一室暖和顏色如木色、米色和卡其色最能讓人感覺舒服和實在。牆紙方面選用了米白色日本和紙，質感有點似縐紙，微微凸起的立體橫紋，有少許點綴而不會過於花巧。Danny更以同色系的床鋪凸顯出睡房的主題，而床頭枱燈和天花燈亦為配合睡房的日和風格而購置。

■窗台以捲簾代替布簾或百葉簾，感覺不會太沉重或太Warm。

■梳妝台後的直身鏡子是女主人的Idea，一鏡可遠近兩用。

■床板及床頭櫃均以深木色為主，小枱燈實用美觀兼備。

客房：少瞓玩花啲

入到客房感覺煥然一新，全房以粉紅色為主，牆紙的Pattern較細密，即使衣櫃也要玩款，櫃面以深淺色的圖案組成，尚嫌未夠？還有花喱碌床鋪和粉紅布簾，夠晒玩嘢，外人睇一定覺得撞到有點眼花撩亂。無錯，Danny都話因為自己少「入住」此房，玩吓Design冇問題！

■衣櫃與牆身一角，視覺夠晒豐富。

■利用窗台位加了抽屜及梳妝台，都統一全是粉紅設計。

書房：玩黑銀Cyber

工作房也很Cool，但黑白配卻換上了黑銀配，勁重金屬味又勁Cyber。牆紙效果就超迷離，外觀有點似噴漆效果，但定眼望多幾秒似乎有點暈，重好似會變色咁？Danny都話：「起初睇辦揀牆紙時都有點怕會眼花，但原來效果也很OK。𠵱家望慣了更不成問題。」不得不提更有貼上了銀板的書枱，加埋窗外透光，效果更明顯，而且都幾光猛同醒神。