隨住溫度上升，哪管難測天雨，伺機到海灘的人浪亦愈見洶湧。之不過，如果去到淺水灣，男的冇腹肌，女的又冇誘人身材，重有咩好玩好騷？Well，今年有新招，因為好多過癮又搶眼的沙灘玩具已經登陸，最爆的一定要數八爪魚水泡，毋須係俊男美女，都必引來豔羨目光！
記者：張銘恩
攝影：陳陶鈞、林栢鈞
模特兒：Tiffany、Tiger仔
水泡巨無霸
應該係2005年最具創意兼爆笑之作！足有七呎闊的八爪魚水泡，全力施展渾身解數時可以一次過攬住六個人，非常巴閉，有佢陪住出海，必定橫行無忌！唯一要提提各位的是，筆者與數位同事合力用了兩個多小時才泵之成型！
尺寸：86.4×86.4×34吋
售價：$199.9（a）
吹氣裝備點止水泡咁簡單
如果你重以為水泡只係一個圓圈加一個窿，未免太Out！今時今日水泡除可以喺茫茫大海中救你一命外，最大功用係畀你揚威耀武，所以外形浮誇又具創意，惹笑又帶有實用性！
浪漫搖搖床
將公園搖搖板的原理放入浮床中，做出這個米奇搖搖床，Size夠晒大，不妨同女友齊齊搖出海，幾浪漫！
尺寸：68×33吋
售價：$244（e）
草菇小森林
怕小朋友玩到忘形曬親都唔覺，不妨睇睇呢個有草菇太陽擋的小童水泡，旁邊有條蛇仔可以枕住手仔，好有童話Feel。
尺寸：27×25吋
售價：$30（b）
超級海龜
綠色大海龜浮床，達重量級水平，用佢陪住出海，威水程度僅次於八爪魚，而且原來將隻龜翻轉來瞓，都勁舒服！
尺寸：72×62.5吋
售價：$99.9（a）
米奇皇帝椅
米奇老鼠梳化形水泡，可以淨係浸住對腳踢吓水咁，重有米奇左右兩手幫你Hold住飲品，好似海上皇帝咁歎！
尺寸：23.5×23.5吋
售價：$187（e）
海上士多
呢個水泡唔可以穿喺身上，因為佢中間可以掀開，儲起一大堆凍飲，夾埋旁邊六個汽水窿，可以帶成十幾罐出海，即時開間活動士多都得呀！
尺寸：直徑31吋
售價：$118（b）
水中飆車
專為小童飛車黨而設的跑車水泡，單一把手，最重可承載23kg，有型抵買。
尺寸：38.8×37.6吋
售價：$49.9（a）
鋸齒太陽神
只想買一個普通水泡，不妨睇睇呢個太陽神，夏日感覺或敵得過惱人天氣，普通得嚟卻勝在夠Sharp！
尺寸：直徑24吋
售價：$19.9（a）
BB歎世界
專為小童而設的小型水泡，同時具備太陽擋及椅背，前面又有波仔玩具，BB實玩得開心。
尺寸：26.5×26吋
售價：$25（b）
沙灘玩具大小通吃
大大嚿的水泡浮床，對冇車之人可能唔多方便。唔緊要，其實細細件的沙灘玩具一樣多花臣，而且大人細路都有份，齊齊玩得更開心！
濕水用飛碟
約直徑10吋的怪獸飛碟，內藏類似海綿物料，濕水後變得墜手成為又安全又好玩的沙灘飛碟，另有其他怪獸款式選擇。
售價：$10（c）
青蛙沙灘波
吹氣沙灘波唔算新鮮，不過呢個青蛙凸眼造型都算搞鬼，較排球大些少，底部有鉛墜，故亦是個青蛙不倒翁。
售價：$18（c）
魚仔任佢射
一包三件唔同造型的魚仔波波，濕水後置手掌大力一鍊，就會水柱四射，Size細細最啱同友人喺水中惡鬥一番。
售價：$15/包（c）
考你潛力
螺旋形彩膠，掟入水中，然後就會慢慢旋轉下沉，形成美麗畫面，不過最重要係用來練習潛水，都幾似放狗！
售價：$33（c）
玩泥沙都要面
有頭有面的大Hit卡通《寵物小精靈》堆沙玩具套裝，包括花灑壺、沙鏟、沙犁同水盆，細路帶住佢威盡全場！
原價：$199
特價：$69（d）
槍林彈雨水槍射程遠至40呎
唔知幾時開始，水槍變成勁受成年人歡迎的夏日玩意，而且愈出愈大把，愈射愈遠，今年新款以射至40呎遠為最勁，各位大朋友，勁射水戰，即來！
着燈顯示
射程可達40呎的YellowJacket，載水量40安士，未泵氣時會着紅燈，而泵足氣量時就會變為綠燈，有咁明確的顯示，實唔會嘥彈藥啦！用2粒2A電。
售價：$89.9（a）
扮Rambo必備
外形十足重型機槍的Piranha，射程亦是40呎，載水量40安士，亦備着燈顯示泵氣量，重有掛帶可以揹住變身Rambo，用2粒3A電。
售價：$129.9（a）
經濟之選
同樣話射程達40呎，亦係以氣泵射水，不過並無注明容量，但勝在經濟好多，唔使入電，夠晒方便，亦備掛帶。
售價：$68（c）
反斗奇兵水槍
幾歲細路仔玩射到40呎的水槍？嚇鬼咩！都係玩番手槍仔夠喇！分別有巴斯光年、索克天皇及人見人愛的三眼仔手槍款，圓碌碌幾鬼Cute。
售價：$29.9/把（f）
售賣點：
（a）玩具反斗城 29916222 尖沙嘴海運大廈地面OTG23號舖
（b）生興特賣場 23903616 旺角花園街174號E地下
（c）金輝玩具 23903337 旺角弼街73號地下
（d）西田百貨 26941111 沙田新城市廣場3期
（e）先施百貨 25442688 中環德輔道中173號
（f）萬信有限公司 查詢熱線：24164499