今個夏天主打賽事洲際國家盃今晚開波，話晒有巴、阿、德三大勁旅撐場，叫座力十足。站喺球迷立場，今屆睇球星同賭波之餘，不妨留意國際足協搞咗唔少強硬措施；例如對球例有新闡釋，又講明球證唔及水準即刻被叮走。睇嚟會長白禮達想為明年世界盃造定嗰勢，擺下馬威咁款喎。
加重球證壓力
又係嘅，近年國際賽無論係球例同埋球證水平都備受抨擊，不嬲要面子嘅白禮達一方面話今屆任何球證執法有問題，就即刻要執包袱；另外又同技術小組委員傾過後，決定執行新例，包括對越位有明確指引。重有，球員不嬲興犯規或個波出界後，加多腳整走個波阻對方即時開波進攻，呢招由今屆賽事開始唔用得，一犯就要領黃牌。
我求大俠覺得球證不嬲唔易做，家陣白禮達開埋聲只會加重球證壓力；至於新例喎，我就話可減少拉布，比賽節奏變相加快，希望因為咁睇波會更過癮啦。