呢排接連有大型新股招股，吸納大量市場資金，大市唔悶先至出奇，好似噚日大市成交金額唔夠100億銀，小初真係為靠佣金為生的經紀老友難過。
好彩中國同歐盟終於就紡織品貿易爭拗講掂數，刺激多隻紡織股急升，例如冠華（539）就升咗5.3％，收2.475元、魏橋紡織（2698）亦升4.6％，收11.35元，連福田實業（420）都升2.4％，收4.275元。
雖然大陸同歐盟講掂數，中美方面則仍未搞掂，但起碼消除咗一部份不明朗因素。早前叫人低吸紡織股的經紀黃，噚日自然鬆毛鬆翼，話證明之前所講趁低買入紡織股的策略冇錯。在芸芸紡織股中，佢比較睇好魏橋，一來隻股size夠大，市場佔有率高，最多芬佬睇住；二來早排幾間外資大行見過魏橋管理層，認同公司業務持續增長，加上魏橋產品唔係太多直接出口歐盟及美國，所受影響相對較低，只係早排紡織股氣氛實在太差，才拖累魏橋股價下跌。
小初亦見到魏橋股價由13元樓上跌落去10元水平時，陸續到有芬佬出嚟收集，現價仍有一定值博率。
慕容小初