前《信報》總編輯兼前中央政策組顧問練乙錚俾特區政府炒魷魚一年後，噚日個大名忽然出現喺《信報》嘅中港評論版。原來佢離開政府之時，已心灰意冷，決定將一切不如意事拋諸腦後，舊年九月中毅然飛咗去英國，學習帆船遠航技術。
練老總以為自己可以學孔子講，「道不行，乘桴浮於海」，不過，當佢喺法國見到拿破崙嘅塑像，又激起佢心潮起伏，最後決定將佢喺中央政策組六年嘅觀察同心得，寫成《浮桴記》，全文四萬字，算係對特區政府盡最後一份責任喎。
嗱，練老總就覺得做人要有始有終，但八方想班特區高官真係戰戰兢兢，噚日第一篇文已然踢爆佢舊年七月五日係俾特區政府革職，又話老董不聽佢嘅忠言，一定要推問責制，又唔肯果斷解決偷步買車嘅阿松，結果令政府管治危機日甚一日。睇番轉頭，如果老董肯聽練老總話，可能唔使黯然下台，真係一場造化。
爆料熱線：29290000、27860099
報料傳真：26239278
報料電郵：[email protected]