早排鄭秀文（Sammi）喺上海拍《長恨歌》期間已經傳過佢有病，如果佢唔係有問題，當然唔會三個禮拜唔肯出房門一步，搞到導演關錦鵬要好遲先可以拍完齣戲。
不過估唔到Sammi返到香港之後，情況一樣冇乜好轉，據講Sammi患嘅係精神科嘅病，其實即係一種心病，聽佢啲朋友講，呢排佢又自閉起嚟，連電話號碼都改埋，同佢玩埋嘅一班老友呢輪都搵唔到佢。
要靠自己克服
其實Sammi近排唔止唔見朋友，就連經理人郭啟華、助手都一樣避，而之前一早安排畀佢嘅工作亦全部唔肯做，搞到佢身邊嘅親人同朋友都幾擔心，而呢個心病相信只可以靠佢自己克服，希望Sammi可以睇開啲，唔好鑽牛角尖，盡快出嚟見吓班fans啦。