大陸黑龍江沙蘭鎮雨災大慘劇，死亡成二百人，村民包圍政府機構，大罵共產黨賤視人命，原來啲公安掛住去慶祝端午節，狂食肥糭，「氹氹轉，菊花園，阿媽帶我睇龍船」，點知二千年前，浸死咗個屈原，今時今日，就全間小學，百名學童，全部化為水鬼，冤屈有排都未完！
北京方面都知大鑊，即時扣起沙蘭鎮黨委書記及派出所所長，「協助調查」！官方開動宣傳機器，聲稱洪水係「二百年一遇」，諉過於天，總之千錯萬錯，都唔係共產黨錯！
所謂「百年難得一遇」、「二百年難得一遇」、「五千年難得一遇」，全部係愚民宣傳，只有零舍蠢過隻豬嘅，先至信「幾多年難得一遇」嘅大炮！瘋狂「開發」，破壞自然生態，斬樹刨草皮，全無監督，點止黑龍江，連華東華南，年年都水災！
老董才是百年難得一遇
「百年難得一遇」？老董上台，將一個繁榮嘅香港，點金成鐵，呢亭「天才」，就真係全人類百年難得一遇嘞！呢句廢話喺香港經已冇人信，內地人民受老共愚民政策影響，可能會矇查查就信以為真，不過連啲網盲糞青，都識得謾罵，有啲重風趣，話點解唔學香港掛風球嘅「警報機制」喎！
學前殖民地 知唔知醜
咁都要學香港？香港嘅成就，係殖民地時代所遺留，連扯風球都要學一個前殖民地，又知唔知醜？點敢當呀？香港現時乜嘢都學「祖國」，包括「選舉領導人」嘅方式，叫「祖國」學香港咁掛風球？乜唔係要改革清除殖民地遺留嘅遺迹咩？
不妨問吓民建聯，睇吓班左共嘅感情會唔會受傷害？香港現時搞緊全港大中小學與幼稚園學店日日扯國旗，扯風球呀？過時嘞！
爆料熱線：29290000、27860099
報料傳真：26239278
報料電郵：[email protected]