交通銀行（3328）噚日首日招股，但未見銀行有長長的人龍排隊攞表。黑客話，排隊攞表係一種相當原始的認購文化，香港人炒股經驗豐富，懂得許多認購渠道，知道唔使排隊都可以認購，因此少人排隊唔代表認購反應麻麻，事實上有唔少新面孔為認購交行而到證券行開戶，或多或少反映市民對交銀的熱情。不過，港股受到交行招股所累，成交跌至不足100億元，恒指收報13952，升17點。
有市民話，認購交行主要因為有滙控（005）做主要股東（滙控持交銀近20%，且有意進一步增持）。滙控之前亦有入股平安保險（2318）。平保以10.33元招股上市，上市後最高升至13.90元，亦曾跌破底價至9.45元，噚日收報12.25元，較招股價有18.6%升幅。換言之，即使有滙控壓陣，都唔代表股份唔會破底，上市後一樣有低吸的機會。
至於明日掛牌的神華（1088），據聞大部份貨派晒畀長線基金，本地行所獲得的分派比率只得6-7%，據初步的試盤反應，肯低於招股價7.50元沽貨的投資者甚少，睇嚟明日應該守得住招股價。
電盈收購前 澤楷屢增持
儀征化纖（1033）成立合營，並將原滌綸五廠注入合營公司，但注資交易會令公司錄得逾4億元的非現金虧損，市場當佢發盈警，股價大跌4.65%至1.23元，噚日國企股當中，以佢跌得最醜樣。
電盈（008）擬以最多2億美元（15.6億元）收購SUNDAY（866），兼會提出全購，市場原本對呢件事都頗興奮，但點知電盈主席李澤楷在過往一個月曾經數度增持電盈，令到呢單交易蒙上陰影。兩股噚日停牌。SUNDAY市值不足16億元，相信全購價唔吸引得去邊。SUNDAY能否炒上，主要視乎市場點睇小小超的能力。
阿虎