煲呔差唔多攞晒啲提名，搞到其他人攞唔到提名選特首。阿牛曾健成同八方講，佢五年前選立法會攞咗上萬個提名，點知就俾胡官抦，話明明法例淨係需要一百個，你攞咁多個係浪費政府人力物力，因為政府要核實晒所有提名人嘅身份。
阿牛投訴話，煲呔呢鋪又係攞突晒提名，重攞咗八、九成提名咁多，又唔見胡官走出嚟，鬧煲呔攞太多提名？八方問過選管會，會唔會好似𡁻阿牛咁，鬧煲呔攞太多提名？選管會就話，法例淨係規定要攞一百個提名，冇講其他喇！
阿牛鬧完選管會嘅胡官，又同埋其他前民主黨少壯派嘅成員好似陶君行、陳國樑等人片李永達，話李永達以前帶頭反對最低工資，𠵱家為咗選特首又支持，要求達仔解釋。
達仔反問，既然佢哋支持最低工資，咁點解唔去鬧反對最低工資嘅煲呔，反而鬧佢呢？
爆料熱線：29290000、27860099
報料傳真：26239278
報料電郵：[email protected]