尖沙嘴重建密密進行，先有新世界河內道項目，再有凱悅酒店，最新嘅係東英大廈。呢幢幾十年歷史嘅老牌名廈，聚集咗唔少醫務所租客，聽到要拆，啲醫生就煩搵地方搬。據悉，有啲怕煩，索性購買寫字樓，等自己嘅醫務所唔再受迫遷威脅。
聽講，東英大廈有兩個醫生，最近不約而同買咗旺角中心，都係十幾樓嘅雙連單位，其中一名，重以七千一蚊呎嘅創新高價買入，貪嗰度交通方便，又有唔少醫生聚集，成行成市，熱熱鬧鬧。
喺東英大廈租咗咁多年嘅醫生租客，就算搬，都會揀番九龍區執業，而旺角中心同埋佐敦嘅嘉賓商業大廈，都係出晒名醫生集中地。
咁睇，呢兩幢商廈，真係唔憂租同唔憂賣。不過，𠵱家呢兩幢商廈嘅醫生租客，可能要擔心日後要面對大幅加租嘅壓力。
電郵地址：[email protected]