修咸頓降班後，主將走嘅走，退休嘅退休，領隊哈利列納想唔為來季組軍頭痕至奇。當佢滿以為幾衰都至少有個仔列納同佢並肩作戰，點知個仔又可能因為膝傷提早掛靴，呢個父子兵再打江山嘅如意算盤難打響囉。
膝傷困擾難馳騁球場
話說三十一歲嘅列納不嬲都係玻璃人，高峯期踢利物浦都成日傷，如今三十一歲已經傷疲交煎；佢日前接受專家診斷後，證實因膝傷可能被迫提早收山。呢個消息對老列納嚟講當然係晴天霹靂，皆因拿索斯退休，A史雲遜、杜特等人亦已離隊，至於菲臘斯、尼美又唔肯跟隊波降班；重有個上咗位嘅長人中鋒哥治，只要利物浦一出價多過五百萬鎊，佢就一定鬆人……，人腳買少見少。
修咸頓有龐大球迷勢力支持，重有個具備英超聯作賽規模嘅靚聖瑪莉球場又點？如果無人才，怕且一樣難翻生。