廣播處前處長張敏儀退休之後，本來優哉游哉，得閒就為好友蒙民偉打理吓個教育及慈善基金，或者四處探朋友，飛嚟飛去，十分自在。不過，佢前晚喺上海朋友屋企廁所唔小心跌倒，俾玻璃割傷手同腳，流咗好多血，傷勢頗重，真係黑仔。
佢朋友見到梗係好驚啦，將張大姐即時送院，醫生話佢割傷咗脈門同大腿，馬上為大姐止血同縫咗幾十針。大姐兩隻手唔郁得，腳亦行動不便，噚日一早已經由上海坐飛機返港醫治，抵達機場嘅時候，都要坐住輪椅。八方都為張大姐驚，好彩醫生話佢嘅病情已經穩定落嚟，叫大家唔使太擔心，當然大姐短期內唔可以四圍走。
張大姐雖然人瞓喺醫院唔郁得，但係心裏面重係掛住十九號要代表蒙民偉出席查良鏞接受英國劍橋大學榮譽院士嘅活動，當然佢自己都想去。
知道張大姐受重傷，八方就勸佢唔好諗咁多啦，一切身體要緊，查大俠同蒙先生一定唔會怪佢。
爆料熱線：29290000、27860099
報料傳真：26239278
報料電郵：[email protected]