可以咁講，《頭文字D》熱潮一共分咗幾「浸」襲港：第一「浸」，漫畫出版，漫畫迷睇紙上飆車場面已經睇到目瞪口呆；第二浸最強勁，三年前電視播動畫、戲院又有劇場版睇，動漫迷、車迷全面被俘虜，馬路上面唔理係密斗、貨Van、定係Jeep仔、跑車，全部變晒「藤原自家用」公司車；第三浸，亦可能係最後一浸，將會由下星期四（6月23日）上映的《頭文字D》電影掀起！
電影未上畫，已經有車行引入戲中主角的戰車AE86炒賣。電影公司更將戲內的AE86作網上拍賣，加埋各大商號電影產品齊齊起哄！飄移、拓海、周杰倫連成一線，定必係近期最Hit話題！
記者：馬慶武
攝影：梁細權、部份相片由寰亞電影公司提供
專訪阿Jay：AE86夠晒爆炸力！
港產《頭文字D》電影，話題性最強的一直都係第一次接拍電影的周杰倫。當《蘋果》記者越洋幫阿Jay做呢個訪問時，最驚奇的係佢竟然承認自己有飆車，重話曾經玩飄移撇甩過狗仔隊！即Check足本訪問內容！
愛上駕車的自由
蘋（本報記者）：你有否親自駕駛過AE86？如有，對此車感覺如何？
Jay（周杰倫）：當然有親自駕駛過AE86啦，開起來的感覺很有爆發力。
蘋：喜歡駕車嗎？為甚麼？
Jay：喜歡，因為只有在開車的時候才有自由的感覺，而且有時候還可以甩掉狗仔隊，蠻有成就感的。
蘋：有沒有飆車的經驗？如有，在哪裏？感覺如何？
Jay：飆車的經驗應該都是在甩掉狗仔隊的時候吧！不過老實說蠻危險的，所以在這邊要跟所有歌迷朋友說：千萬不要學習。
蘋：戲內或現實中有沒有試過做出飄移動作？感覺如何？
Jay：其實飄移是一種很高難度的駕駛技術，在戲中飄移的動作都是由特技人員來駕駛。不過我在現實中甩掉狗仔的時候，也有做出類似飄移的動作。
我的DreamCar如衣服
蘋：現時擁有多少輛汽車？哪一輛最常駕？
Jay：老實說我也不曉得自己到底有幾部車（咁都得？好明顯你唔想講噃！），而且因為都很喜歡，所以每部車我都會輪流開。
蘋：DreamCar是哪一款汽車？為甚麼？
Jay：DreamCar到現在都還沒出現，就像女人一樣，衣櫃裏永遠少一件衣服。
蘋：戲中那輛AE86將會作網上拍賣，據說你都有興趣競投，是真的嗎？預計成交價約多少？
Jay：我現在還不曉得這件事，不過如果是慈善拍賣，成交價當然是愈多愈好！
蘋：為甚麼會有興趣擁有這輛AE86？
Jay：其實只要是特別的車子我都會有興趣收藏，而且AE86這款經典車款，外表平實也是另一種特色。
蘋：拍這套戲最難忘是甚麼？為甚麼？
Jay：最難忘的就是現場看到特技演員做出飄移的動作，那種感覺無法形容。
蘋：如果可以選擇，會當原著中哪個角色？為甚麼？
Jay：還是選擇拓海，因為他的台詞最少。（哈！咁都得？）
拓海戰車6.23拍賣
曾於戲中出現的AE86真身，將會由6月23日至7月7日期間於淘寶網上進行拍賣。雖然阿Jay未清楚成件事，但據講阿Jay到時都會同各車迷進行激烈競投，唔知有冇人可以喺拓海手上搶走呢部車呢？
網頁：淘寶網www.hk.taobao.com
查詢：22155300
十年車都要十萬
87年停產的豐田AE86，因為易甩尾（甩尾係飄移的初步動作，即《頭文字D》內的Drift）、易救（操控性好），一早已經好多識車之士玩緊。不過自從《頭文字D》漫畫出現後，港日皆出現炒賣潮。現時全港僅得十幾架AE86，唔係被人收藏晒就係被人炒到飛天，最新二手車成交價$98,000，奇！乘住電影即將上畫的氣勢，一向玩開AE86的波哥就搵嚟三架二手AE86，原味三門版、激改雙門版都有，最平三萬蚊有交易，想揸住架AE86去睇《頭文字D》？有計！
極罕！AE86二手盤
最平之選：85年雙門AE86（二手價：$30,000）
勁改落場版，內櫳有防滾架桶Seat，其他「多餘」設備如冷氣、乘客座椅全部拆晒，抵買好飛，想出牌喺街行就要裝番好多嘢。（日恆）
炒完即拆！
場內有架剛炒AE86，波哥話會拆番啲零件出嚟備用，重話AE86零件應該佢最多，各位有咩事記得搵波哥！
馬力超過200匹：87年三門AE86（二手價：$78,000）
同樣都係波哥擁有，不過就擺咗喺二手車場寄賣。同拓海戰車一樣係三門款，不過就冇「彈燈」，新淨兼大量補品，死氣喉嘈到拆天之餘，據稱馬力重超過200匹，有聲有畫面！（德記）
拓海同款戰車：84年三門AE86（二手價：$68,000）
同期唯一一部同拓海部戰車完全同款的二手車盤，出面有錢都買唔到！此車為入口水貨車，據波哥講喺日本一樣好難搵。可以噴油改裝到同電影裏面嗰部一模一樣，價錢約二萬至三萬蚊，可向日恆查詢。
查詢：
日恆汽車零件貿易公司（24886670）
德記汽車服務有限公司（24404988）
有錢未必買得齊頭文產品
未有車牌、買唔起車的飄移Fans，一樣可以瞓身支持拓海！因為電影公司為配合今次電影上畫，推出咗大量相關產品。有啲可以用錢買，有啲就要上手機台、飲啤酒換，要儲齊一套，都唔係話有錢就掂！
真金白銀買
查詢：www.esdlife.com及部份戲院發售
飲生力換購
查詢：www.sanmiguel.com.hk
one2free貴Plan
查詢：29722123
電影公司贈品
查詢：23144288
動漫迷、車迷直選心水角色
Jay勁似拓海！
Ivy：「最愛周杰倫，佢唱歌好聽又有型，做咩角色都掂！而且對眼成日好似未瞓醒咁款，真係勁似漫畫裏面的拓海。」
小春正在粗魯
Yuki：「難得佢咁老先轉玩HipHopLook，有型吖！而且佢喺戲裏面的京一角色，粗粗魯魯都有啲似佢！」
冧死余文樂眼神
Wing：「我愛余文樂！佢嘅眼神好似漫畫裏面啲人物，而且啲場面製作好認真，一定會睇！」
