八方上個星期喺維園六四晚會撞到劉千石，估唔到過咗幾日又喺中環一間餐廳見到佢。阿石當時同朋友飲下午茶，八方聽見把聲咁熟，望吓先發現原來係中央政策組嘅劉兆佳同李明堃。
八方之後問阿石，係咪成日同政府大智囊聊天，佢話唔係，一年一兩次，竟然都俾八方撞到。噚日身在內地嘅阿石話，會面主要係傾吓香港嘅最新情況，冇乜大新聞，佳叔有問候佢阿媽，但係就再冇講回鄉證嘅問題。
梗係啦，阿石已經攞到十年有效回鄉證，當然唔使再傾。問阿石提咗邊個名，佢始終係嗰句，如果阿達有九十九票，佢嘅一票一定畀佢。咁即係廢話啦，唔怪得達仔冇搵佢。
問佢會唔會投煲呔？佢話唔知，最後可能一個都唔提，棄權算啦。阿石𠵱家講嘢模棱兩可，唉，都係等十六號再問佢睇吓佢會點。
傳真︰2623-9278
電郵︰[email protected]