大嚿陳偉業噚日揚威球場，佢同八方講，諮詢過啲選民同街坊之後，佢星期六已經提名咗煲呔。八方問佢係唔係受到大班影響，佢就死都話冇問過大班。
至於長毛，大嚿話佢一早講咗唔接受小圈子選舉，所以唔會提名任何人。大嚿、長毛同「煲呔針」（即大班）三個加埋，人稱叫做「大長針」，佢三人嘅破壞力肯定唔可以睇小，煲呔攞到其中兩個人嘅提名，都算叻仔。
八方問陳偉業有冇同民主派先打個招呼？怕唔怕以後唔受佢玩，大嚿就理直氣壯話泛民主派唔係政黨，之間冇約束性，而且佢係按民意提名，對於達仔，佢形容大家「太熟識，知道佢嘅問題喺邊」，所以唔提佢。
「如果換咗係卿姐、馬丁或者Ronny湯，我一定會提。」大嚿一向我行我素，噚日佢喺社工大遊行見到湯狀，重笑佢應該參選，因為佢一定攞到一百票提名。
傳真︰2623-9278
電郵︰[email protected]