瘦田都有人爭，肥田當然唔會放過。免費報紙市場自從由《都市日報》一炮打響之後，一直未見有競爭者。最近中原施永青計劃同九鐵合作，出一份《中原日報》，點知某上市報業集團橫裏殺出，計劃搶免費報紙市場，九鐵現在變咗皇帝女唔憂嫁。
好多報行中人都話辦報艱難，但現實卻係好多人想入行，而《都市日報》短短時日就賺大錢，又確實吸引。有熟悉免費報營運者話，《都市》之成功，其實同其他收費報怠慢有關。在其他城市，有免費報推出，報業同行必然照辦煮碗，自己搞多份一模一樣嘅，你派我又派，反正用現有資源成本有限，策略唔係賺錢而係累鬥累，等你捱唔住，自動退出。香港嘅老細點解咁大方，佢就話唔明。不過，𠵱家施老闆出擊，大財團又插手，《都市日報》都要準備應戰。
傳真︰2623-9278
電郵︰[email protected]