三十多歲可謂是人生最豐盛之年，但劉先生卻曾以為自己沒有將來。四年前他證實患上「馬凡氏綜合症」，隨時會動脈血管爆裂而暴斃。經過多次手術，他換了部份人工心臟血管，過着正常生活，更懂得笑說：「呢個病唔係絕症。」
從事文職的劉先生，現年三十七歲，他與其他病人一樣，最初患上馬凡氏綜合症，完全接受不了。「嗰時呢個係乜病，可以話聽都未聽過。我病發之前一直以為自己好健康，行山、打籃球、跑步，做好多運動，甚至好似去旅行潛水，好多人覺得高危嘅活動，我都去做。」
他憶述四年前病發經過說：「嗰晚已經深夜，突然間覺得心口同背脊好似俾人劈咁痛，我喺張床轆來轆去，即時叫白車送入聯合醫院。入到醫院，醫生第一個反應重話我咁後生，唔會有心臟病。」數天後他先後再到瑪麗醫院及葛量洪醫院檢查，證實患上馬凡氏綜合症，心臟主動脈爆裂。
面對突如其來的噩耗，劉先生稱：「好沮喪，對個病認識又少，完全冇心理準備要做大手術，唔知道將來會點，甚至唔知道重有冇將來，重會唔會康復出院。」經過多次手術，他的心臟換上了部份人工血管及心瓣。住院半年，他逐漸復康出院，近年再沒有病發入院。他也由最初不願接受現實，至今已積極面對病情。
令劉先生重新對人生抱有希望，是家人和朋友的關心及支持。「執番條命我覺得自己都算好彩，病咗之後對我生活影響唔大，我冇因此而失業，一切都正常，更加睇到親人同太太都好愛我。」
劉先生雖然也擔心隨時病發，但強調會更注重日常生活習慣，做適量運動，定時服藥，經常保持平靜心境和情緒。他勉勵其他病友說：「呢個病唔係絕症，其實只要控制好生活習慣，可以減低病發嘅風險，一樣可以令自己健健康康咁生活落去。」
本報記者
逢周一刊出